BAGIAN PARJOLO / PONGGOL PADUAHONBindu 2
Goar, Inganan, dohot Parjongjongna
1. Goar i ma Huria Kristen Batak Protestan na pinajempek gabe HKBP.
2. Huria Kristen Batak Protestan i ma pardomuan ni halak Kristen sian sude marga dohot houm ni bangso Indonesia, dohot nasa bangso di sandok portibi on na tardidi tu bagasan Goar ni Debata Ama, Anak dohot Tondi Parbadia. Sada hapataran ni Pamatang ni Kristus do HKBP, na manghamham na porsea na marpanindangion di sandok portibi on.
3. Na jongjong do HKBP di Indonesia on dohot di sandok portibi on jala markantor pusat di Pearaja Tarutung.
4. HKBP ojak di ari 7 Oktober 1861, na jongjong sian hadirionna marhitehite pangulaon ni Tondi Porbadia. Laos diokui Pamarenta do HKBP marhite Bisolot No. 48 tanggal 11 Juni l931 na tarsurat di Staatsblad taon 1932 No. 360 dohot haputusan ni Direktur Jenderal Bimas Kristen Protestan Departemen Agama No. 33 tahun 1988 tanggal 6 Februari 1988.
1. Ia ruas ni HKBP i ma: 1.1. Halak naung tardidi jala halak naung manghangoluhon pangoloion tu Debata Ama, Anak, dohot Tondi Parbadia. 1.2. Na unduk tu Konfessi, Aturan dohot Paraturan, Ruhut Parmahanion dohot Paminsangon HKBP dohot angka ruhut haKristenon di HKBP. 1.3. Na tarsurat goarna di buku ripe manang buku ruas ni huria i.
2. Hak ni Ruas 2.1. Taruli di hata ni Debata, asa manghirim di bagabagaNa di bagasan haporseaon, marhite parmingguon dohot na manjalo Parpadanon na Badia. 2.2. Mangido dohot manjalo Pandidion na Badia tu angka dakdanakna, pano gunoguon di bagasan haKristenon, manghatindanghon haporseaon, pamasumasuon parbagason dohot hangoluan sogot di ujung ni ngolu sian portibi on. 2.3. Partohap di nasa parsaulian sian Huria. 3. Kewajiban ni Ruas 3.1. Gabe sitindangi ni Kristus di tongatonga ni parsaoran hatopan marhite angka silehonlehon na adong di dirina be. 3.2. Mandohoti ulaon panghobasion di Huria. 3.3. Mamangke dohot mangalehon gogo, pingkiran dohot sinadonganna tu ulaon huria sian las ni roha (2 Kor.9:7).
4. Mansohot sian Haruason: Mansohot do halak sian haruason ni huria molo: 4.1. Pinda tu Huria na so HKBP. 4.2. Laho tu ugamo na asing. 4.3. Naung dipabali sian Huria ma ngihuthon Ruhut Parmahanion dohot Paminsangon HKBP. 4.4. Monding.